ग चे गाणे

ग चे गाणे 

ग ग गवत हिरवे हिरवेगार ।।

गाय आली तिला गवत चार ।।

गाय गेली जंगलात, फिरुन आली गोठ्यात

गाईचा गोऱ्हा आला बागडत बागडत
गडबड गुंडा, दगड धोंडा

उंदराच्या टोपीला लावा गोंडा
ग ग गवत  हिरवेगार ।।

आता तुम्ही गची बाराखडी म्हणा

ग गा गि गी गु गू गे गै गो गौ गं गः

गोल गोल पोळी फुग फुग फुगली

गूळ-तूप लाऊन गट्टम केली
ग ग गवत  हिरवेगार ।।

हर हर गंगे भागीरथी

गोदावरी, गंडक आणि गोमती

गणपति आले गौरी आल्या

पाऊस आला गारा पडल्या
ग ग गवत  हिरवेगार ।।

अंगत पंगत बसवली

गंमत जंमत आम्ही केली

ग चे गाणे गाइले कुणी

आई बाबा आणि सोहमनी
ग ग गवत हिरवेगार ।।
------------------------------------------

क चे कमळ, दिसते किती छान

क ला काना का

सोहमने लिहिला क


सोहम साठी आज लिहिलेले गाणे ---
क चे कमळ, दिसते किती छान
क ला काना का  त्याने लिहिला कान ।
काळा काळा कावळा गेला दूर उडूनी।
कसा, कधी, का, काय, किती, कुठे, कुणी ।
क का कि की कु कू के कै को कौ कं कः
सगळ्या अक्षरांची आता मजा पहा।
कोकिळ आणि कोकिळा गाती कुहू कुहू
कोंबडा आरवतो कसा कुकूचकू।
कशी जोडी जमली कुलुप आणि किल्ली
काळी पांढरी लाल निळी हिरवी अन पिवळी।
कच्ची पक्की कैरी झाडावरून पडली
कुणी कुणी तिला मीठ लाऊन खाल्ली ।
किती किती सांगू कच्या गोष्टी
चला पळा आता झाली शाळेला सुट्टी।